أنا الخبر ـ متابعة
ناصر بوريطة وزير الخارجية والتعاون مشى لاذاعة “اورب 1” الفرنسية باش يدوز ميساجات لاوربا ولاسبانيا. بوريطة كان صارم باش هدد مدريد. قال باللي “اليوم كاين مشكل ثقة ومشكلة احترام متبادل مع اسبانيا” وباللي هي اللي خاصها تلقي حل في اشارة الى قضية دخول ابراهيم غالي زعيم البوليساريو بجواز سفر ديبلوماسي جزائري وهوية مزورة بلا اخبار الرباط. فحالة الي ما لقاتش حل او رجع فحالو بوريطة واضح “غاديين نمشيو للقطيعة”. بوريطة لمح باللي كاينة شي محاولة لتهريبو.
هاد القطيعة بدات بوادرها. بوريطة كذب وزيرة خارجية اسبانيا لايا گونزاليث. كانت قالت باللي كاينة اتصالات على مستويات مختلفة لايجاد حل للمشكل مع المغرب. وزير الخارجية نفى هاد الشي فحوارو مع “اوروب 1” “ضدا على ما قالته وزيرة الخارجية الاسبانية راه ما كاين حتى شي اتصال بينا وبين اسبانيا منذ بداية هاد الازمة”، وكذبها حتى فموضوع اخبار المغرب فقضية غالي “وعكس ما قالته الوزيرة المغرب ما عمرو تخبر”
فهاد الحوار كان المستهدف هو مخاطبة الاتحاد الاوربي. بوريطة قال باللي هادي مشكلة مغربية اسبانية ولكن مدريد ورطات الاتحاد. واوضح ان مدريد ما خبراتش بروكسيل باش تغات تستاضف غالي وباللي هي اللي باغية دخل الاتحاد الاوربي.
كما كشف ان الرباط ماشي من واجبو يحمي أوربا. ولا كان كيديرها راه فاطار الشراكة وبين الشركاء كتكون علاقات متبادلة مبنية على التفاهم وفق مصالح كل طرف
كما ذكر ان المغرب يوظف 20 الف باش يحمي حدود اوربا وانو فكك 8 الاف خلية للاتجار بالبشر ووقف 14 الف محاولة للهجرة السرية منها 80 محاولة المرور الى سبتة وان هاد البلاد تبادلات مع اسبانيا اكثر من 9 الاف معلومة خاصة بالهجرة. (المصدر: كود)